Англиядаги The Sun таблоидида 2016 йилги Европа чемпионати вақтида Россия ва Англия ўртасидаги учрашув вақтида россиялик мухлислар томонидан инглиз ишқибозларига ҳужум тайёрланаётгани ҳақида мақола чоп этилди.

Қайд этиш керакки, Англия ва Россия терма жамоалари турнирнинг гуруҳ босқичида, "В" гуруҳида бирга жой олишган (Словакия ва Уэльс ҳам шу гуруҳда).

Нашрнинг қайд этишича, москвалик фанатлар ("Спартак" ва ЦСКА мухлислари) Францияда англиялик мухлисларга қатор ҳужумлар уюштиришни режалаштиришган. Бундан ташқари, бундай миллатчи мухлислар махсус тайёргарликдан ўтиш базаларида ҳужум вақтида қўлланадиган жанг санъатларини ўрганишмоқда.

The Sun нашри бундай гуруҳлардан бирининг раҳбари Юрийнинг сўзларини келтиради.

"Бизнинг гуруҳимиздагиларнинг аксари армияда хизматни ўтаган. Биз англияликлар каби қизларнинг кийимларида юрадиган ўсмирлар эмасмиз. Францияда Москва ва Санкт-Петербург жамоалари мухлислари бирлашади.

Биз ўрмонларда жанг қиламиз. Поездларда кетаётганда уларни урамиз ва ўйин вақтида ҳам уларни калтаклаймиз. Инглизлар бизга қарши тура олмайди. Ҳа, бизга пиво симириш ва қизлар ҳам ёқади, лекин биз учун энг биринчи ўринда турадигани - муштлашишдир", дейди у.

Шунингдек, чемпионатга Украина ва Польшадан ҳам радикал кайфиятдаги мухлислар келиши хавотир билан кутилмоқда.