"Бавария" жамоаси дарвозабони Мануэль Нойер ЕЧЛнинг нимчорак финалида Туриннинг "Ювентус" жамоасига қарши кечадиган учрашув олдидан ўз фикрларини билдириб ўтди ва рақиблар дарвозабони Жанлуиджи Буффон ҳақида алоҳида тўхталди.

"Жанлуиджи кўп йиллар давомида халқаро майдонларда юқори савиядаги ўйинини барқарор сақлаб келаётган дарвозабон.

Мен унинг Италия терма жамоаси сафидаги ва ЕЧЛдаги ўйинларини доимий равишда кузатиб келаман. У мен учун ҳамиша намуна бўлиб келган. Унга қарши ўйин ўтказиш ҳамиша инсонда ажиб туйғулар уйғотади. Буффон - ҳамиша очиқкўнгил ва барча билан дўстона муносабатда бўлади. Биз бир-биримиз билан жуда яхши муносабатдамиз", дейди Нойер.

Кейин у ўзи ҳақидаги саволларга жавоб қайтарган.

"Ўзимнинг ҳозирги спорт формамни қанча вақт сақлаб қолишим ҳақида фикр билдира олмайман. 29 ёшда бу ҳақда ўйлаб гапириш керак. Менинг ёшимда ўзингни асраш ҳақида кўпроқ ўйлашинг талаб этилади. Айни вақтда ўзимни яхши ҳис қиляпман, лекин 5 йилдан кейин ҳам шундай бўлишига кўзим етмайди", дейди у.

Эслатиб ўтамиз, “Ювентус” – “Бавария” ўйини сешанбадан чоршанбага ўтар кечаси, Тошкент вақти билан соат 00:45да бошланади.