Андижон вилоятида туғилган фуқаро бир неча одамларни алдаб, турли ваъдаларга ишонтириб, берган пулларини ўзлаштириб юборгани аниқланди.

Унинг устидан ёзилган шикоят аризасидан сўнг, олиб борилган суриштирув-тергов жараёнларида айбланувчи кўплаб фуқароларнинг ишончига кириб, товламачилик жиноятини содир этгани маълум бўлди.

Аниқланишича, айбланувчи хотинининг вафотидан сўнг, пул топиш мақсадида Ангрен шаҳрига боради ва у ерда бир аёл билан танишиб қолади. 2010 йилда улар шаърий никоҳдан ўтишади. Орада аёлга қарашли уйни 11 минг АҚШ долларига сотишади. Йигит шаърий хотидан “Тошкентда бизнес бошлайман”, деб 7000 АҚШ долларини олади, бироқ бир сўмини ҳам қайтармайди. Икки орада аёл уйсиз қолади.

“Огоҳ” газетасининг ёзишича, у шаърий хотинининг таниши бўлган аёлдан “Кобальт” русумли автомашина олиб бераман, деб 3000 АҚШ долларини олган ва қайтармаган. Шунингдек, яна бир аёлни 2011 йилдан 2014 йилгача алдаб, 11000 АҚШ доллари, 5 миллион 400 минг сўм, қиймати 3 миллион сўмлик телеффон аппарати ва яна бир қанча қимматбаҳо буюмларини олиб, қайтариб бермаган.

Қаллоб бундан ташқари бозорда ҳам бир неча одамларнинг соддалигидан фойдаланиб, ишларини ҳал қилиб бериш мақсадида пул олиб, ўз эҳтиёжлари учун сарфлаб юборгани аниқланди.

Айбланувчи Ўзбекистон Республика ЖКнинг тегишли моддаларига мувофиқ, жиноий жавобгарликка тортилди.