«Барселона» жамоаси «Атлетик»нинг моҳир ҳимоячиси Эмерик Лапорт учун курашда енгилди. Футболчи ёзги трансферлар вақтида Англиянинг «Манчестер Сити» жамоасига ўтиши масаласи ҳал бўлган. Бу ҳақда Sport.es нашри хабар ёзган.

Каталонияликлар жамоаси ушбу футболчи ўйинларини 2 йилдан буён кузатиб келишаётганди ва ёзда уни трансфер қилишни режалаштиришганди. Лекин Хосеп Гвардиоланинг янги мавсумда «Манчестер Сити»да иш бошлаши ҳақидаги хабар уларнинг режаларини чиппакка чиқарган.

«Шаҳарликлар» раҳбарияти Гвардиоланинг истаги билан Эмерикни таркибга жалб этиш борасида музокара бошлашган ва унинг ўзи билан келишиб олишган. «Манчестер Сити» эндиликда «Атлетик» билан трансфернинг бошқа жиҳатлари бўйича музокара олиб боришади, 21 ёшли бу франциялик футболчининг шартномасида унга 50 млн евролик нарх белгилаб қўйилган.