Мадриднинг «Реал» клуби мавсум сўнгида Криштиану Роналдуни сотиши мумкинлиги хабар қилинди.

Бу ҳақда El Confidencial нашрининг хабар беришича, «Реал Мадрид» аввал ҳам 31 ёшли португалиялик футболчини сотиш имконияти ҳақида ўйлаб кўрган. Аммо Испания чемпионатининг 26-турида «Атлетико»га қарши кечган учрашувдан кейин Роналдунинг «Агар бутун жамоа менинг даражамда ўйнаганда, биз биринчи бўлардик» — деган фикри бу истакни янада кучайтирган.

Эслатиб ўтамиз, «Атлетико»га қарши кечган учрашувда «Реал» 0:1 ҳисобида мағлуб бўлган эди. Кейинчалик эса, Роналду ўз фикрини «Мен буни гапирганимда, жамоанинг жисмоний тайёргарлигини назарда тутгандим. Мен жамоадошларимнинг бирортасидан устун эмасман» — дея изоҳлаган.

Нашр маълумотларига кўра, «Реал» Роналдунинг ўрнига «Бавария» клуби ҳужумчиси Роберт Левандовскини харид қилишга уриниб кўради.