Daily Star нашрида айни вақтда ПСЖ жамоасини бошқариб турган Лоран Блан «Манчестер Юнайтед»га таклиф этилиши мумкинлиги ҳақида хабар берилди.

«Қизил иблислар» жамоаси раҳбарияти айни вақтда жамоани бошқариб турган голландиялик мутахассис Луи ван Гаал номзодини қўллаши ҳақида бир неча бор маълум қилган бўлсада, зимдан унга ўринбосар қидиришда давом этаётгани айтилган.

Бунгача нашрлар ёзда Манчестерда Жозе Моуриньо иш бошлаши ҳақида ишонч билан ёзишаётганди. Ван Гаалнинг ўрнига Райан Гиггз тайинланиши мумкинлиги ҳақида ҳам хабарлар берилган.

Қайд этиш керакки, Блан ўз вақтида, футболчи сифатида 2001-2003 йиллар мобайнида «Манчестер Юнайтед» жамоаси шарафини ҳимоя қилганди ва 48та учрашувда иштирок этганди.

Айни вақтда «Манчестер Юнайтед» АПЛнинг 29 туридан кейин 47 очко тўплаган ҳолда олтинчи ўрнида бормоқда. Жамоа ЕЧЛни тарк этгач, Европа Лигасида иштирок этишни бошлади. Турнирнинг нимчорак финалида «Манчестер Юнайтед» «Ливерпуль»га қарши жуфтлик ҳосил қилган. Ўтган ҳафтада ўтказилган биринчи учрашувда ван Гаал шогирдлари сафарда 0:2 ҳисобида мағлуб бўлишди. Жавоб учрашуви 17 март куни «Олд Траффорд»да ўтказилади.