ФИФА Кувайт терма жамоасининг 2018 йилги жаҳон чемпионати саралаш босқичининг 2-раундида Лаос ва Жанубий Кореяга қарши учрашувларини Кувайт футбол уюшмасининг ташкилотдан четлатилгани сабабли қолдирди.

2015 йил сентябрда ФИФА ижроия қўмитаси Кувайт футбол уюшмасини агар мамлакатнинг спорт борасидаги қонунчилигида ўзгаришлар амалга оширилса, унинг ташкилотда аъзолиги тўхтатилиши мумкинлигидан огоҳлантирганди. ФИФА фикрича, бу ўзгаришлар Кувайт футбол уюшмасини мустақилликдан маҳрум қилади. Кувайт томони 15 октябргача чоралар кўриши керак эди, бироқ буни қилмаган, шундан кейин ФИФА Кувайтнинг аъзолигини тўхтатган.

G саралаш гуруҳида иштирок этувчи Кувайтнинг Лаосга қарши учрашуви 24 мартга, Жанубий Кореяга қарши учрашуви 29 мартга белгиланганди.

ФИФАнинг хабарида таъкидланишича, ўйинларни “ишларнинг айни вақтдаги ҳолатида” ўтказиб бўлмайди.