Юнон-рум кураши бўйича Ўзбекистон ёшлар терма жамоаси аъзолари Қозоғистонда ташкил этилган халқаро турнирда ўн бир медалга сазовор бўлди. Бу ҳақда ЎзА хабар бермоқда.

Тажрибали спортчимиз, ўсмирлар ўртасида Осиё чемпиони, II ўсмирлар Олимпиадаси ғолиби Илҳом Баҳромов вазни 55 килограммгача бўлган курашчилар беллашувида барча рақибини мағлубиятга учратиб, шоҳсупанинг энг юқори поғонасига кўтарилди.

Вазни 50 килограммгача бўлган полвонлар баҳсида Жасур Ортиқбоев, 60 килограммгача оғирликдаги курашчилар ўртасида Жавоҳир Мираҳмедов, 120 килограммгача вазн тоифасидаги полвонлар беллашувида Далер Раҳматов биринчи ўринни эгаллади.

Терма жамоамиз аъзоларидан Лочин Жўраев, Абубакр Алимов, Жалғас Бердимуродов кумуш медални қўлга киритди. Муҳаммадқодир Юсупов, Салоҳиддин Холматов, Жаҳонгир Мадумаров ва Музаффар Комилжонов бронза медалга лойиқ топилди.