Март ойининг ўртасида Флориданинг Амелия-Айленд оролида ўтказилган кимошди савдосида 1937 йил намунаси бўлган Bugatti 57SC Sports Tourer спорткари сотувга қўйилди. Автомобиль 9.73 миллион долларга сотилган.

Кимошди уйи вакилларининг сўзларига кўра, мазкур машина нафақат аукционда энг қимматга сотилган Bugatti 57S, балки Амелия-Айлендда савдога қўйилган энг қимматбаҳо уруш даври автомобили саналади. Намунанинг бошланғич нархи 6 миллион долларни ташкил этган. Спорткарнинг янги соҳиби исми ошкор этилмаган америкалик хусусий коллекциячи бўлди.

Сотиб юборилган Bugatti 57SC Sports Tourer 1937 йилда янги ҳолатда Нью-Йоркка келтирилган. Бир йилдан сўнг, Лондондаги моторшоуда намойиш этилган. Автомобильда 200 от кучи қувватли 3.3 литрли саккиз цилиндрли мотор жойлашган. Спорткар барча ғилдиракларида тўрт поғонали механик узатгич қутиси ва гидравлик дўмбира тормоз механизмига эга.