Американинг спорт кийимлари ишлаб чиқарувчи Nike компанияси боғичлари автоматик тарзда боғланувчи янги “HyperAdapt 1.0” кроссовкаларини тақдим этди. Бундай кроссовкалар машҳур “Келажакка қайтиш” (Назад в будущее) фильмининг қаҳрамони Мартин Макфлайда мавжуд бўлган. 

Биринчи кроссовка Марти Макфлай ролини ижро этган актёр Майкл Жей Фоксга Nike компанияси томонидан ўтган йилнинг октябрь ойида тақдим этилган эди.

Кроссовкаларни сотиб олиш ҳуқуқи Nike+ клуби аъзоларига тақдим этилади. “Кроссовкаларни кийганингизда, товонларингиз махсус сенсорларни ишга солади ва тизим автоматик тарзда пойабзал боғичларини тортади. Икки ён тарафда боғични тортиш ва бўшатиш учун тугмалар мавжуд”, - деди кроссовка тақдимотида компаниянинг техник бўлими ходими Тиффани Бирс.

Мазкур модель янги кийимлар ва спорт аксессуарлари билан бирга намойиш этилди, шу йўл орқали компания 2020 йилнинг охирига келиб 50 миллиард доллар фойда кўришни режалаштирмоқда.