Самвел Бабаян бош мураббийлигидаги Ўзбекистон миллий терма жамоаси ЖЧ-2018 иккинчи саралаш босқичи сўнгги икки ўйинидан олдинги йиғинга киришди.

Таъкидлаш жоиз, айни дамда терма жамоа йиғинига чақирилган футболчилар Тошкентга етиб келишди. Фақатгина Россия чемпионатида тўп сураётган Одил Аҳмедов ("Краснодар"), Виталий Денисов ("Локомотив"), шунингдек, кеча ўз жамоаси "Ал Жаиш" сафида Осиё Чемпионлар Лигаси гуруҳ босқичи ўйинида "Насаф"га қарши майдонга тушган Сардор Рашидов йиғинга кейинроқ келиб қўшиладилар. Қолган барча футболчилар Тошкентдаги йиғинда терма жамоа сафига келиб қўшилишди.

Миллий терма жамоа бош мураббийи Самвел Бабаян мазкур йиғинда иштирок этадиган футболчиларнинг кенгайтирилган таркибини аввалроқ эълон қилган эди.

Эслатиб ўтамиз, сўнгги икки ўйин олдидан Ўзбекистон терма жамоаси олти учрашув ўтказиб, 15 очко тўплаган ҳолда гуруҳда иккинчи ўринни эгаллаб турибди. Гуруҳда ҳозирча 7 учрашувда 16 очко жамғарган КХДР терма жамоаси пешқадамлик қилмоқда.

Маълумот учун, Ўзбекистон миллий терма жамоасининг Жаҳон чемпионати 2018, иккинчи саралаш босқичи доирасидаги сўнгги икки ўйинни Тошкентдаги “Бунёдкор” стадионида бўлиб ўтади.

Ўзбекистон миллий терма жамоасининг 24 март куни бўлиб ўтадиган Филиппинга қарши учрашуви ҳам, Баҳрайнга қарши 29 март куни бўладиган ўйин ҳам 18:00да старт олади.

Ўзбекистон миллий терма жамоасининг "ЖАР" стадионидаги машғулотларидан фотосуратларни сайтнинг "Галерея" бўлимида томоша қилиш мумкин.

Манба: the-uff.com