Эргашходжаев Исламджан Джасурович Тошкент вилояти ҳокимининг маъмурий масалалар, ҳуқуқни муҳофаза қилиш органлари фаолиятини мувофиқлаштириш, ўзини ўзи бошқариш органлари ва ёшлар сиёсати бўйича биринчи ўринбосари этиб тайинланди. Бу ҳақда ҳокимлик сайтида хабар қилинган.

Исламджан Эргашходжаев 1970 йилда Тошкент вилояти Паркент туманида туғилган. 1995 йилда Тошкент давлат юридик институтини тамомлаган.

У бу лавозимни эгаллагунига қадар 2011 йилдан Тошкент вилояти Пискент тумани ҳокими бўлиб ишлаган.

Унгача эса Оҳангарон туман прокурори (2011 йил), Оҳангарон шаҳар прокурори (2009-2011) ва Тошкентнинг Миробод тумани прокурори (2004-2009) лавозимларида фаолият юритган.

1999-2004 йилларда Ўзбекистон Бош прокуратурасида турли лавозимларда фаолият кўрсатган.

Эслатиб ўтамиз, Президентнинг 24 февралдаги қарори билан вилоятлар, Тошкент шаҳри, шаҳарлар ва туманлар ҳокимиятларининг бошқарув аппаратининг янгиланган тузилмаси тасдиқланди. Ўзгаришларга кўра, вилоятлар ва пойтахт ҳокимлари ўринбосарлари сони ҳокимнинг маъмурий масалалар, ҳуқуқни муҳофаза қилиш органлари фаолиятини мувофиқлаштириш, ўзини ўзи бошқариш органлари ва ёшлар сиёсати бўйича биринчи ўринбосари лавозимининг жорий этилиши ҳисобига беш нафардан олти нафарга оширилди.