Татаристоннинг собиқ президенти яқинларини ўлдирганликда айбланаётганлар суд олдида жавоб бермоқда

Жамият 18 Март 2016 370

Татаристон прокуратураси суддан Татаристон тери-таносил диспансери бош шифокори Ринат Ахмадиевнинг оиласини ўлдиришда айбланаётган икки нафар ўзбекистонлик – 51 ёшли Инъом Маҳкамов ва 44 ёшли Игорь Сусановни 19 йилга озодликдан маҳрум қилишни сўрамоқда, деб хабар бермоқда ТАСС ахборот агентлиги.   

“Давлат қораловчиси бугун томонларни тинглашда ҳар бир судланаётганга 19 йил озодликдан маҳрум қилишни, ундан 5 йилини турмада, қолган қисмини эса қаттиқ тартибдаги колонияда ўташ жазосини белгилашни таклиф қилди”, деб маълум қилди Татаристон прокуратураси матбуот хизмати.    

Полициячилар 2015 йил сентябрда 15 йил аввал амалга оширилган шов-шувли қотилликни фош қилишди. Тергов версиясига кўра, жиноятчилар Татаристоннинг собиқ президенти Минтимер Шаймиевнинг қариндоши ҳисобланган Ринат Ахмадиевнинг уйига “катта пулга эга бўлиш илинжида” босқинчилик ҳужуми уюштирган. Ҳужумда яна бир Галибабин исмли кимса иштирок этган. У айни вақтда вафот этган.

“Жиноятчилар Ахмадиев, унинг аёл таниши ва икки нафар ўғлини ўлдиргач, уйдаги баъзи қимматбаҳо нарсаларни ўғирлаб, изларни йўқотиш мақсадида уйни ёқиб юборишган”, дейилмоқда тергов ҳужжатларида. 

Тергов давомида 2000 йилда Ахмадиевнинг уйида таъмирлаш ишларини амалга оширган Маҳкамов ва Сусанов жиноятга алоқадор бўлиши мумкинлиги ўрнатилган. Россия Тергов қўмитасининг Татаристон бўйича бошқармаси маълумотларига кўра, жиноятчилар жиноятни амалга оширгач Ўзбекистонда яширинишган. Уларни 2015 йилнинг ёзида қўлга олишга муваффақ бўлинган. 

2015 йил июнда Маҳкамов Санкт-Петербургга келганда ундан бармоқ излари олинган. Бармоқ излари жиноят жойида аниқланган бармоқ излари билан мос келгандан кейин, жиноятчи Қозонга етказилган. Жиноятчи ўз айбини тан олган ва ўзининг ҳамтовоқлари ҳақида кўрсатма берган.

Иккинчи жиноятчи Сусанов Маҳкамовнинг кўрсатмаларидан кейин Новосибирскда қўлга олинган.

Кўпроқ янгиликлар