Бугун, 19 март куни Англия чемпионатининг 31 тур ўйинлари бошланди. Дастлабки ўйин Ливерпулнинг «Эвертон» жамоаси ва Лондоннинг «Арсенал» жамоалари ўртасида кечди.

Лондонликлар жамоаси кейинги йилларда ўзлари учун ноқулай бўлган бу рақибни бу сафар мағлуб этиб қайтди.

Дастлаб, ўйиннинг 7-дақиқасида Дэнни Уэлбек ҳисобни очди. Ўйинда лондонликларнинг устунлиги давом этди ва тайм якунланиши арафасида 19 ёшли ҳужумчи Алекс Ивоби ўзининг «Арсенал» учун расмий учрашувлардаги илк голини уриб, ҳисобдаги фарқни иккитага оширди.

Иккинчи бўлимда ҳисоб ўзгармади ва «Арсенал» сафарда муҳим 3 очкони қўлга киритди.

Эндиликда «Арсенал» 31 турдан кейин 55 очко жамғарган ҳолда (захирада битта ўйин бор) турнир жадвалининг учинчи ўрнида жойлашган.

Бу турда «Челси» - «Вест Ҳэм», «Саутгемптон» - «Ливерпуль» каби тўқнашувлар бор. Турнинг марказий учрашуви эса «Манчестер Юнайтед» ва «Манчестер Сити» ўртасида кечади.

Турнир жадвалида биринчи ва иккинчи ўринларни эгаллаб турган «Лестер» ва «Тоттенҳэм» мос равишда «Кристал Пелас» ҳамда «Борнмут» жамоаларини қабул қилади.

Эвертон – Арсенал 0:2 (0:2, 0:0)

Голлар: 0:1 – 7 Уэлбек, 0:2 – 42 Ивоби.
Эвертон – Роблес, Джагелка, Бейнс, Коулмэн, Фунес Мори, Маккарти, Бешич (Стоунз, 46), Баркли (Деулофеу, 73), Леннон, Клеверли, Лукаку.
Арсенал – Оспина, Габриэл, Монреаль, Бельерин, Косьельни, Коклен, Эль-Ненни, Озил (Гиббс, 74), Санчес, Уэлбек (Жиру, 75), Ивоби (Чемберс, 86).