«Арсенал» жамоаси бош мураббийи Арсен Венгер «Бавария» ва «Барселона» жамоаларининг кучини инглиз жамоалари билан таққослади.

«Бавария» ва «Барселона» жамоаларига энди енгилмас жамоалар нисбатини бериш шарт эмас. «Барселона»га қарши 2 ўйиндаги натижадан қайғудаман, чунки аввалги йиллардагига қараганда бу сафар уларни енгишимиз учун имконият кўпроқ эди. Улар аввалгидек кучли эмас.

Айтиш мумкинки, инглиз жамоалари учун Англия чемпионатининг ўзи ЕЧЛ мақомида. Бу ерда ҳар бир ўйин қийин кечади, шу туфайли биз Европа майдонларида жабр чекамиз.

«Барселона» бизга қарши ўйиндан олдинги ўйинларида майдонда югуриб эмас, юриб ғалаба қозонди. Шанба куни улар 20 дақиқа ичида 3та гол ўтказган жамоага қарши ўйнашганди. Улар Испанияда истаган ишларини қилишлари мумкин, Англияда эса бунга йўл қўйилмасди.

Футболда энг муҳими савияли футболчиларга эга бўлишдир. Мен ишонч билан айтаманки, премьер-лигадаги молиявия шароитлар туфайли энг кучли футболчилар Англияга келишда давом этишади ва бу бошқа лигаларнинг кучли эканига муносиб жавоб бўлади. Авваллари Англия жамоалари ЕЧЛнинг чорак финалларида ёки ярим финалларида тўқнашиши одатий ҳол эди, аниқ ишонаманки бундай даврлар қайтади.

Мен телевидениени айбламайман. Сиз менга премьер-лиганинг ўйинлар жадвали инглиз жамоаларининг халқаро майдонлардаги иштирокини ва манфаатларини ҳисобга олган ҳолда тузилиши керакми деб савол беришингиз мумкин. Мен эса йўқ дейман. Ахир аввал ҳам график тиғиз бўларди ва биз шундай шароитларда халқаро майдонларда яхши иштирок этганмиз», – дея қайд этади Венгер.