ФИФАнинг Ахлоқ бўйича қўмитаси Франц Беккенбауэр ва Немис футбол иттифоқи (DFB) аъзолари бўлган 5 нафар собиқ амалдорга нисбатан иш очди. Бу ҳақда ташкилот сайтида хабар қилинган.

Ушбу шахслар Германиянинг 2006 йилги жаҳон чемпионати мезбонлигини қўлга киритишида коррупцияга қўл ургани гумон қилинаётганди.

Бундан олдинроқ, Беккенбауэр ФИФА қўмитаси билан ҳамкорлик қилишни истамаганди ва жаримага тортилганди. DFB ҳам 2006 йилги мундиалга мезбонлик қилиш қўмитасига бошчилик қилган Беккенбауэрга нисбатан иш очганди.

ФИФА ахлоқ қўмитасининг мустақил тергов палатаси ФИФА президенти Йозеф Блаттер, УЕФА президенти Мишель Платини ва ташкилотнинг собиқ бош котиби Жером Валькега қарши тергов ишлари давом этаётганлигини тасдиқлаган.