Машҳур америкалик актёр Жорж Клуни ва унинг рафиқаси Амаль 21 март куни махсус лоторея ўйинини ташкил этишди.
Ғолиб апрель ойида уларнинг Лос-Анжелесдаги уйида меҳмон бўлиш имконига эга бўлади. Ўйинда иштирок этиш учун рўйхатдан ўтиш кифоя, лекин ғоя муаллифлари ҳеч бўлмаса 5 доллар тўлов амалга оширишни сўрашади.

Ушбу акция Демократик партиядан президентликка даъвогар Ҳиллари Клинтонни қўллаб-қувватлаш учун ташкил этилди. Лоторея ўйинидаги барча маблағлар Клинтоннинг сайлов жамғармасига келиб тушади.

“Амаль ва мен Ҳиллари билан биргаликда 16 апрель куни Лос-Анжелесдаги уйимизда йиғиламиз ва уйимизда Сизни ҳам кўриш биз учун шараф, - дейди Клуни ҳозир ижтимоий тармоқларда тарғиб қилинаётган лотореяни реклама қилар экан. – Яхши янгилик шундаки, овқатни мен пиширмайман”.

Клинтон жамғармасига қатнашчилар минамал – 5-10 доллардан то бундай кўринишдаги ўтказмалар учун максимал бўлган 2,7 минг долларгача тўлашлари мумкин. Ташкилотчиларнинг ваъдасига биноан, ғолиб Клуни ва унинг рафиқаси билан суҳбатлашиши, уларнинг уйини томоша қилиши ва АҚШ президентлигига номзоднинг шахсан ўзи билан учрашиши мумкин бўлади.

Агар Клуни ёки Клинтоннинг мухлислари омадга умид қилишни истамасалар, ушбу “кеча”да иштирок этишнинг кафолатли йўли ҳам мавжуд. Актёр 16 апрель куни ўз уйида, шунингдек, Сан-Францискода ҳам шу каби маросим ўтказмоқчи. Бундай шоҳона кечки овқатнинг нархи 33,4 минг доллар. Таклиф этилганлар орасида режиссёр Стивен Спилберг, актриса Кейт Кэпшоу, британиялик қўшиқчи Шерил ва бошқа Демократик партияни қўллаб-қувватловчи машҳурлар бор.

Клинтон сайлов жамғармаси маълумотига кўра, ҳозиргача миллиондан ортиқ америкаликлар пул ўтказганлар.
2012 йили Жорж Клуни Барак Обамани қайта сайлаш кампаниясига маблағ тўплаш учун шундай тадбир ўтказиб, 15 миллион доллар пул йиғишга муваффақ бўлган эди.