Жаҳон чемпионати-2018 иккинчи саралаш босқичи доирасидаги Ўзбекистон – Филиппин учрашуви олдидан матбуот анжумани ўтказилди. Унда дастлаб Филиппин бош мураббийи Томас Дулей иштирок этиб, ўйин олдидан фикрлари билан ўртоқлашди. Бу ҳақда Ўзбекистон футбол федерацияси матбуот хизмати хабар тарқатган.

“Тошкентда ажойиб об-ҳаво ҳукмрон ва стадион ҳам жуда чиройли. Таркибдаги баъзи муаммоларга қарамай, эртага ажойиб натижа намойиш этишга ҳаракат қиламиз.

Мен реалистман ва биламанки, Ўзбекистон гуруҳдаги энг кучли жамоа. Гуруҳимиз ҳам саралашдаги энг қийинларидан бири. Бундан ташқари, саралаш ўйинлари давомида жуда узоқ вақтни оладиган парвозларни амалга оширишга тўғри келди. Бу ҳам жамоанинг жисмоний ҳолатига таъсир қилади. Шуларнинг барчасини ҳисобга олиб айтишим мумкинки, эратага осонликча очко қўлга кирита олмаймиз. Лекин ўйиндан фақат яхши натижалар кутаман.

Мен келажакда Филппин футболи ривожланган давлатлардан бирига айланишига ишонаман. Аййни вақтда мамлакатда энг оммалашган спорт турларидан бири айнан футбол. Буни ҳайратланарли жойи йўқ. Чунки футбол жаҳон бўйлаб энг машҳур спорт тури ҳисобланади. Шунингдек, филиппинликлар, биласиз, одатда бўйдор бўлишмайди. Айтайлик, баскетбол билан шуғулланишса, уларда профессинал ўйинчи бўлиш учун имкониятлари кам. Футболда эса вазн ёки ҳажм аоссий ролни ўйнамайди. Унда маҳорат кўп нарсани ҳал қилади. Футбол орқали мамлакат ижтимоийлашиши ва бирлашиши ҳам жамиятни олдинга қадам ташлашида муҳим аҳамиятга эга.

Ўзбекистон барча жабҳаларда гуруҳнинг энг кучли жамоаси. Техник, жисмоний ва тактик томондан улар гуруҳдаги барча жамоалардан устун. Бу жамоада кучли лигадаларда тўп сураётган легионерлар ҳам бор. Эртанги ўйинда биз аутсайдер эканимизни биламиз. Лекин футболда ҳамма нарса бўлади. Рақибнинг кучли томонларини билганимиздек, заиф жиҳатлари ҳам йўқ эмас. Биз улардан фойдаланишга интиламиз”, - дейди Филиппин бош мураббийи.