Невада штати губернатори Брайан Сэндовал учувчисиз парвоз қурилмаси ёрдамида шаҳар шароитида жўнатмани етказиш доирасида Хоторн шаҳрига биринчи почта жўнатмаси етказилганини маълум қилди. Бу ҳақда Associated Press ахборот агентлиги маълум қилди.

Ушбу жараённи амалга оширган Flirtey компанияси бош директори Мэтт Суинининг маълум қилишича, жўнатмани етказган дрон ярим мил учиб ўтиб, шаҳарнинг кимсасиз ҳудудига ўзидаги пакетни ташлаган, чунки жўнатма етказиладиган аниқ манзил бўлмаган.

Дроннинг маршрути GPS ёрдамида берилди. Пакетда ичимлик суви идиши, озиқ-овқат маҳсулотлари ва дори-дармон қутиси бўлган.

"Учувчисиз парвоз қурилмалари ёрдамида шаҳар шароитида биринчи жўнатмани етказиш катта муваффақият ҳисобланади ва бизни учувчисиз самолётлар тўғри сизнинг эшигингизга мунтазам равишда жўнатмаларни етказадиган кунга яқинлаштиради", деб айтди Суини.

Невада губернатори компанияни бу ютуқ билан табриклади.