Эркин Азимов Самарқанд вилояти, Тайлоқ туманидаги “Пилла” МЧЖ раиси лавозимига ўтиргач, кўп ўтмай бир қанча қинғирликларга қўл урди. У аҳолига ипак қурти етказиб бериш ва давлатга пилла хомашёсини топширишда ўз манфаатини барчасидан устун қўйди. Бу ҳақда “Ҳуқуқ” нашри хабар бермоқда.

Хусусан, тумандаги “Давлатобод”, “Ғулба”, “Тепақишлоқ”, “Боғизағон”, “Элипок”, “Ворсин”, “Жумабозор”, “Олмазор”, “Қўшчинор”, “Соҳибкор” агрофирмалари ҳудудларида фаолият юритаётган фермер хўжаликларида аслида тайёрлаб берилмаган ва топширилмаган 27 минг 225 кг. (қиймати 204 млн. 188минг сўмлик) пилла маҳсулотларини расмий ҳужжатларини сохталаштириб, қабул қилиб олади.

У барча маълумотларни сўралган жойларга юборади. Бу билан у давлат ва жамият манфаатларига жиддий зарар етказилишига сабабчи бўлади.

Бундан ташқари, ўзи билан ишловчи ходимлар — тарозибонлар Акрам Шарипов, Зойир Жумаев ҳамда омбор мудири Абдусамад Ахтамовни айбдор деб кўрсатмоқчи бўлади.

Суд томонидан Э.Азимовга нисбатан тегишли ҳуқуқий чоралар кўрилди.