Ўзбекистонда дипломатларнинг шахмат мусобақаси бўлиб ўтди

Ўзбекистон 28 Март 2016 2753

Шахмат бўйича республика ихтисослаштирилган болалар-ўсмирлар олимпия захиралари спорт мактабида мамлакатимизда аккредитациядан ўтган дипломатик корпус, халқаро ташкилотлар ваколатхоналари, хорижий фирма ва компаниялар вакиллари ўртасида анъанавий шахмат турнири бўлиб ўтди. Бу ҳақда “ЎзА” хабар бермоқда.

Мусобақанинг очилишида Ўзбекистон ташқи ишлар вазирининг ўринбосари Д.Ҳакимов ва бошқалар Президентимиз Ислом Каримов раҳнамолигида навқирон авлодни жисмонан соғлом, маънан етук, юксак интеллектуал салоҳиятли этиб вояга етказиш, спортнинг барча турлари қатори шахматни изчил ривожлантириш борасида амалга оширилаётган кенг кўламли ислоҳотлар юксак самаралар бераётганини алоҳида таъкидлади.

Ўзбекистон Республикаси Ташқи ишлар вазирлиги ва мамлакатимиз шахмат федерацияси томонидан ташкил этилган мусобақада АҚШ, Хитой, Германия, Франция, Индонезия, Ҳиндистон, Россия, Бангладеш, Вьетнам, Грузия, Латвия, Озарбайжон, Туркманистон, Тожикистон, Қозоғистон ва бошқа давлатларнинг элчихоналари, БМТ Тараққиёт дастури, Германия халқаро ҳамкорлик жамияти, шунингдек, Жаҳон иқтисодиёти ва дипломатия университети вакиллари ўзаро куч синашди.

Турнирда АҚШнинг Ўзбекистондаги элчихонаси жамоаси биринчи ўринни эгаллади. Иккинчи ўринга Жаҳон иқтисодиёти ва дипломатия университети, учинчи ўринга эса Афғонистон элчихонаси ва “Lukoil Uzbekistan Operating Company” масъулияти чекланган жамияти вакиллари сазовор бўлди.

– Ўзбекистон шахмат мактабининг нуфузи тобора юксалиб бормоқда, – дейди Италиянинг мамлакатимиздаги Фавқулодда ва мухтор элчиси Риккардо Манара. – Жаҳон спорт ареналарида юксак натижаларга эришаётган Ўзбекистон спортчилари сафи тобора кенгайиб бораётгани эътиборга молик. Мазкур мусобақа халқлар ўртасида дўстлик ва маданий алоқаларни янада мустаҳкамлашга хизмат қилади. Турнир доирасида Шахмат бўйича республика ихтисослаштирилган болалар-ўсмирлар олимпия захиралари спорт мактаби фаолияти билан яқиндан танишиш имконига эга бўлганимиздан хурсандмиз. Бу ерда ёш шахматчилар учун яратилган шароитлар бизда катта таассурот қолдирди.

Кўпроқ янгиликлар