Наврўз байрамига бағишланган тантаналарни нишонлаш навбати энди Тошкент молия институтига ҳам етиб келди. Айём руҳига мос безатилган “Ёшлик” талабалар шаҳарчасидаги майдонда институт ўқитувчилар жамоаси, талабалар ва тадбир меҳмонлари байрам сайлини ўтказишди.

Алоҳида эътироф этиш жоизки, тадбирга иштирокчилар – устоз ва талабалар, меҳмонларнинг катта қисми #NavrUZ ёзуви туширилган махсус футболкаларда ташриф буюришди.

Хурсандчилик, тинч ва хотиржам ҳаётимиздан шукрона руҳида ўтказилган байрам тантанаси давомида қатнашчилар томонидан туширилган суратлар ва видеолавҳалар фаол равишда e-yoshlar.uz сайтига жўнатиб турилди.

Талабалар иштирокида юртимизнинг турли вилоятлари урф-одат ва анъаналари акс этган саҳна кўринишлари, рақс ва қўшиқлар йиғилганларда катта қизиқиш ва улкан таассурот қолдирди. Санъаткорларнинг чиқишлари, байрамона безатилган дастурхон кўтаринки кайфият янада ортишини таъминлади. Байрам сайли кўринишида ўтказилган тадбир талабаларга қувончли лаҳзалар ва аъло кайфият тақдим этди. Йиғилганларнинг барчаси байрам маросимидан хурсанд ва шод ҳолда айём тароналарига жўр бўлишди.