Жиззах вилоятининг Зарбдор туманидаги 11-болалар мусиқа ва санъат мактабида Ўзбекистон Республикаси Олий Мажлиси Қонунчилик палатаси депутати, Тадбиркорлар ва ишбилармонлар ҳаракати – Ўзбекистон либерал-демократик партияси фракцияси аъзоси Нодирбек Ражабов сайловчилар билан учрашди. Бу ҳақда “ЎзА” хабар бермоқда.

Депутат тадбиркорликни ҳуқуқий ҳимоя қилиш, касб-ҳунар коллежлари битирувчилари бандлигини таъминлаш бўйича эришилаётган самаралар ҳақида сўз юритди.

– Президентимиз раҳнамолигида амалга оширилаётган давлат сиёсатининг устувор йўналишларидан келиб чиқиб, жойларда қонунчилик ижросини кучайтириш олдимизга қўйилган вазифаларни тўлиқ бажаришнинг кафолатидир, – дейди Н.Ражабов. – Бу ёшлар тарбияси ва улар бандлигини таъминлашда яхши самара бермоқда. Партиянинг сайловолди дастурида ёшлар бандлигини таъминлаш, уларни тадбиркорлик соҳасига янада кенг жалб этишга кўмаклашиш бўйича белгиланган вазифаларнинг изчил амалга оширилаётгани ҳам бунинг ёрқин тасдиғидир.

Учрашувда депутат иштирокчиларни қизиқтирган саволларга атрофлича жавоб қайтарди.