Самарқанд вилоятидаги Ҳазрат Довуд зиёратгоҳида таъмирлаш ва қайта қуриш ишлари олиб борилмоқда. Шу муносабат билан бир ой давомида зиёрат чекланади. Бу ҳақда "Зарафшон" газетаси хабар берган.

Ҳазрат Довуд зиёратгоҳи Самарқанд шаҳридан 40 километр ғарбда, Нуробод туманининг Оқсой қишлоғи тепасида жойлашган афсонавий ғор ҳисобланади. Ривоятларга кўра, Ҳазрат Довуд темир ва тошни эритиш қобилиятига эга бўлган. Темирчилар уни ўзларининг пири сифатида кўришади.

Зиёратгоҳда бинолар ва иншоотлар қуриш бўйича кенг кўламли ишлар олиб борилмоқда. Яқин орада марказий йўлдан тоғ этагигача бўлган етти километр йўл қурилиши тугалланади, унинг бир қисми аллақачон асфальтланган. Унга туташ жойда 200та автомобилга мўлжалланган автотураргоҳ барпо этилади.

"Бу йил 3000 дан зиёд арча, қарағай, каштан, тут ва бошқа манзарали дарахт, кўплаб гул кўчатлари экдик. 5 гектарга яқин майдонда зиёратчиларга қулайлик яратиш мақсадида стол ва ўриндиқларга эга 50та ёзги айвон, 200та чорпоя қурилди", – дейди Ҳазрат Довуд зиёртгоҳи мудири Фозил Давронов.

Зиёратчилар учун икки ва уч ўринли коттежларга бўлади. Шунингдек, 40 ўринли уч қаватли меҳмонхона қурилиши тугалланмоқда. Унинг биринчи қаватида гўзаллик салони, дўконлар, бошқа маданий-маиший хизмат нуқталари жойлашади. Иккинчи қаватда меҳмонлар ва зиёратчиларга миллий ва европа таомлари билан ресторан хизмат кўрсатади. Учинчи қават – меҳмонхона. Унинг чордоғидан спорт зали сифатида фойдаланиш мўлжалланмоқда.

Ҳудуддаги сув муаммосига барҳам бериш учун 60 тонна сиғимга эга сув омборчаси барпо этиш режалаштирилган.