«ЛУКОЙЛ Узбекистан Оперейтинг Компани» МЧЖ Тошкент шаҳридаги Инҳа университети (IUT) талабаларига грантлар ажратишга тайёр. Бу ҳақда компания вакили IUTга ташриф давомида таъкидлади, деб хабар бермоқда университет матбуот хизмати.

«ЛУКОЙЛ Узбекистан Оперейтинг Компани» МЧЖнинг ходимлар билан ва ташкилий ривожланиш бўйича бош директори ўринбосари Сергей Старостинский 29-март куни IUTга ташриф буюрди ва университет ректори Шерзод Шерматов билан учрашди.

Учрашув давомида «ЛУКОЙЛ» вакили IUT ўқув дастури ва талабаларга яратилган шароитлар ҳамда тайёрлов ва корпоратив курслар билан танишди.

Ўз ўрнида Сергей Старостинский «ЛУКОЙЛ»нинг Ўзбекистондаги лойиҳа ва режалари, жумладан, Қандим газни қайта ишлаш комплекси учун ходимлар тайёрлаш ҳақида сўзлаб берди.

Учрашув давомида томонлар ўртасида ҳамкорликнинг истиқболли йўналишлари муҳокама қилинди. Жумладан, талабаларнинг «ЛУКОЙЛ» компаниясида амалиёт ўташлари ва компания мутахассислари томонидан талабалар учун маъруза ўқиш масалалари кўриб чиқилди.

Сергей Старостинскийнинг таъкидлашича, «ЛУКОЙЛ» компанияси АКТ соҳасида мутахассислар тайёрлаш муҳимлиги ва IUTнинг мутахассислар тайёрлаш бўйича юқори стандартларини ҳисобга олиб, IUT талабаларини қўллаб-қувватлаш дастурини очишни режалаштирмоқда.

Учрашув сўнггида Сергей Старостинский университет ташрифлар китобига ўзининг самимий тилак ва истакларини ёзиб қолдирди.