Тошкент давлат иқтисодиёт университетида ўтказилган видеосеминарда ёшларни ишга жойлаштириш масаласи муҳокама қилинди. Бу ҳақда «ЎзА» хабар бермоқда.

Ўзбекистон Республикаси Олий ва ўрта махсус таълим вазирлиги, Ўрта махсус, касб-ҳунар таълими маркази, Бандлик ва меҳнатни муҳофаза қилиш республика илмий маркази ва бошқа ташкилотлар ҳамкорлигида ташкил этилган тадбирда касб-ҳунар коллежлари раҳбарлари, ўқитувчилар, иш берувчи корхоналар вакиллари, ўқувчилар иштирок этди.

Университет проректори И.Аҳмедов, Ўрта махсус, касб-ҳунар таълими муассасалари битирувчиларини ишга жойлаштиришни таъминлаш бошқармаси бошлиғи А.Раҳмонов ва бошқалар таълим билан амалиётнинг узвий олиб борилаётгани замонавий билим ва ишлаб чиқариш кўникмасига эга ёш мутахассислар тайёрлашга хизмат қилаётганини таъкидлади.

Ўзбекистон Республикаси Вазирлар Маҳкамасининг 2015 йил 10 мартдаги «Касб-ҳунар коллежлари битирувчиларини ишга жойлаштириш тизимини янада такомиллаштириш бўйича қўшимча чора-тадбирлар тўғрисида»ги қарори асосида ўтган ўқув йилида касб-ҳунар коллежларини тамомлаган 482 мингдан зиёд ўғил-қизнинг тўқсон тўрт фоизи ишга жойлашган. 13 мингдан зиёд ёш тадбиркор тижорат банкларидан 142 миллиард сўм имтиёзли кредит олиб, ўз бизнесини йўлга қўйган.

Жорий ўқув йилидан битирувчилар бандлигини таъминлаш тўрт томонлама шартнома («корхона – коллеж – битирувчи – ҳокимлик») асосида амалга оширилмоқда. Битирувчилар учун 300 миллиард сўмдан зиёд маблағлар имтиёзли равишда берилиши режалаштирилмоқда.

Эндиликда туман, шаҳар ва вилоят ҳокимликлари ҳузурида касб-ҳунар коллежлари битирувчилари бандлигини таъминлаш, уларни ишга жойлаштириш штаби фаолият кўрсатади. Ҳар йили касб-ҳунар коллежлари ва лицейларга қабул режасини ишлаб чиқишда 3-4 йилдан сўнг туман, шаҳар ва вилоятлар ҳудудида қандай янги объектлар ишга туширилиши, уларда меҳнат қилиш учун қайси мутахассисликлар бўйича кадрлар кераклиги ҳисобга олинади.