Аргентина терма жамоаси ҳужумчиси Лионель Месси 2016 йилги Америка Кубогининг стартини ўтказиб юбориши мумкин.

El Mundo нашрининг ёзишича, Каталония суди «Барселона» ҳужумчиси Лионель Месси ва унинг отаси Хорхе Месссининг иши бўйича суд мажлиси муддатини ўзгартирган. Улар солиқ тўлашдан бош тортишда айбланмоқда.

Суд мажлиси аввал белгиланганидек 31 май куни эмас, 7 июнь куни бўлиб ўтади. Бу Мессининг 6 июнь куни Чилига қарши кечадиган илк учрашувда майдонга туша олмаслигини англатади.

Месси 2007 йилдан 2009 йилгача бўлган муддат давомида жами 4,1 млн евро миқдоридаги солиқни тўламаганликда айбланган.

Испания давлат адвокатураси Мессига 22,6 ойлик қамоқ жазоси ва жарима қўллашни талаб қилган. Прокуратура эса бу жиноятда футболчининг отасини айблаган ва уни 18 ойга озодликдан маҳрум этишни сўраган.