Пойтахтимизда бошланғич касаба уюшмалари ташкилотлари етакчиларининг республика форуми бўлиб ўтди. Бу ҳақда «ЎзА» хабар бермоқда.

«Бошланғич ташкилот – касаба уюшма ҳаракатининг асоси» шиори остида ўтказилган тадбирда тармоқ ва ҳудудий касаба уюшмалари, турли корхона ва ташкилотларнинг бошланғич касаба уюшма ташкилотлари раҳбарлари ва фаоллари қатнашди.

Бугунги кунда корхона, ташкилот ва муассасаларда 37 минг 457 бошланғич касаба уюшма ташкилоти фаолият кўрсатиб, унда 6 миллион 200 мингдан ортиқ касаба уюшма аъзосининг ижтимоий-иқтисодий манфаати ва меҳнат ҳуқуқи ҳимояланмоқда.

– Корхонамизда 3 минг 230 киши ишлайди, – дейди Олмалиқ шаҳридаги «Аммофос-Максам» акциядорлик жамияти касаба уюшмаси қўмитаси раисининг ўринбосари Махсутали Маматов. – Ходимларнинг меҳнат муҳофазаси, ижтимоий ҳимояси ва саломатлигини мустаҳкамлаш бўйича касаба уюшмаси қўмитаси юридик ва бухгалтерия бўлимлари билан ҳамкорликда иш олиб бормоқда. Бу қулай ва хавфсиз иш шароитларини яратиш, ходимлар учун ижтимоий-маиший имтиёзлар белгилаш, уларга моддий кўмак кўрсатиш, ўзи ва оила аъзоларини соғломлаштиришда кутилган ижобий натижаларни бермоқда.

Форумда бошланғич ташкилотлар фаолияти самарадорлигини янада ошириш бўйича 2016-2017 йилларга мўлжалланган дастур қабул қилинди.