Азамат Нуруллаев (исм-фамилиялар ўзгартирилган) Мингбулоқдаги касб-ҳунар коллежларидан бирида бош ҳисобчи бўлиб ишларди. Миллион сўм пуллар қўлидан ўтгани учун улар ақлини олдими ёки орадан икки уч йил ўтиб “тажрибаси ошди”ми, хуллас, 2014 йилнинг март ойидан бошлаб унинг кўнглига эгрилик оралай бошлайди. Бу ҳақда “Ҳуқуқ” нашри хабар бермоқда.

2015 йилнинг февраль ойида 8 нафар ишчи-ходимнинг иш ҳақларидан уларнинг пластик карталарига 2 млн. 108 минг сўм кам тушириб, бу пулларни коллеж ходимлари О.Абдуллаева ҳамда Г.Асқарованинг пластик карталарига йўналтириб, ўз манфаатлари йўлида ишлатади.

Бундан ташқари, 2015 йил апрель ойида бюджетдан ташқари пенсия жамғармаси Мингбулоқ туман бўлимига шу ойда ҳисобланган пенсия ва нафақаларга 1 млн. сўм ортиқча талабнома бериб, мазкур талабнома асосида молиялаштирилган маблағни яна бир ходим К.Валиев номидаги пластик картага ўтказади-ю, амалда ўзи ишлатиб юборади.

2013-2014 ўқув йилида коллежда таҳсил олган собиқ талаба Д.Омонов номидаги пластик картага асоссиз равишда 2015 йил апрель ойида 902 минг сўм чин етим нафақа пули, 2014 йил сентябрь ойида ўзининг пластик картасига 510 минг сўм, 2014 йил декабрь ойида 65 минг сўм ортиқча пул тушириб, бу маблағни ҳам “жиғилдонига уради”.

Ҳуқуни муҳофаза қилувчи органларнинг саъй-ҳаракати билан унинг қилмишларига чек қўйилди. Унга нисбатан жиноят иши қўзғатилиб, суд ҳукми билан жавобгарликка тортилди.