Жанубий Кореянинг Samsung компанияси дисплей ва камерани кўз косасининг бевосита ўзида жойлаштириш имконини берувчи контакт линзалар ишлаб чиқармоқчи. Ушбу янгиликка патент олиш учун аризани SamMobile илғаб қолган, аммо қўшимча реалликни ҳосил қилиш учун бундай қурилмадан қандай фойдаланиш мумкинлигига ойдинлик кирита олмаган.

Қурилма смартфондан симсиз уланиш орқали қувват олади. Линзага ҳаракат датчиги ўрнатилади. Унинг ёрдамида кўзни юмиш ёки очиш билан ускунани бошқариш мумкин бўлади.

Патентда Google Glass’ни ўз ғоясига намуна сифатида кўрсатган бўлсада, Samsung’нинг фикрича, Google Glass каби қурилмалар кўришнинг энсизлиги ва тасвирнинг сифатсизлиги билан ажралиб туради. Ишлаб чиқарувчилар, ушбу муаммони, линза орасига митти OLED дисплейни ўрнатиш билан ҳал этмоқчи.

Қайд этиш ўринлики, тадқиқотчилар ичига дисплей ўрнатилган линзаларни аввал ҳам ишлаб чиқишган, аммо бундай линзалар кўп вазифаларни бажара олмаслиги ҳамда пикселлар сонининг камлиги ва кам синаб кўрилгани билан ажралиб туради.

Электрон контакт линзалари орасида ҳозирча Google’нинг смарт линзалари эътиборга моликдир. Улар қондаги глюкоза миқдорини аниқлаб линза эгасини огоҳ этиши мумкин. У икки йил аввал оммага намойиш этилган бўлсада, ҳамон синов жараёнида.

Айтиш жоизки, Samsung’нинг патентга аризаси тайёргарлик босқичида турибди ва ҳозирча топширилгани йўқ.