Ахборот технологиялари ва коммуникацияларини ривожлантириш вазирлигида жорий йилнинг 7 апрель куни Жанубий Кореянинг LG CNS компаниясининг янги тайинланган президенти Ким Ён Соб билан учрашув бўлиб ўтди. Бу ҳақда вазирлик матбуот хизмати хабар берган.

Учрашув давомида томонлар LG CNS Uzbekistan қўшма корхонаси томонидан айни пайтда амалга оширилаётган ишлар ва истиқболдаги ривожи хусусида фикр-мулоҳазаларини баён этди. Хусусан, халқаро андоза талабларига жавоб берадиган дастурий маҳсулотлар ишлаб чиқариш, корхонага малакали мутахассисларни жалб этиш ва маҳаллий кадрлар салоҳиятини ошириб бориш, хорижий бозорга чиқиш билан боғлиқ жиҳатлар юзасидан фикр алмашилди.

LG CNS компаниясига 1987 йилда LG корпорацияси томонидан асос солинган. Жанубий Кореянинг ахборот технологиялари хизматларини кўрсатиш соҳасида энг йирик компанияси бўлиб ҳисобланади. Компания бутун жаҳонда 10 дан ортиқ минтақавий офисларига эга ҳамда унда фаолият юритувчи ходимларининг сони 10 мингдан ортиқ. LG CNS компанияси ахборот технологиялари, консалтинг, тизимли ва тармоқ интеграцияси, бизнес-жараёнлари ва ахборот технологиялари аутсорсинги соҳасида ихтисослашган.