Россиянинг Липецк шаҳрида яшовчи, "Барселона" мухлиси Николай Волков ўзининг энди туғилган ўғлини каталон клуби ва Аргентина терма жамоасининг ҳужумчиси Лионель Месси исми билан атади.

Бахтиёр ота ўғлининг туғилган куни санаси севимли футболчисиники билан мос тушгани сабабли унга футболчининг исмини беришга қарор қилди.

Болакай 24 мартда, унинг машҳур адаши эса 24 июнда туғилган. Бу отанинг ўз ўғлига Лионель Месси деб исм беришига сабаб бўлди. Отанинг фикрича, бундай исм унинг тақдирини белгилаб беради.

"Менинг бутун оилам ҳайратда. Рафиқам бошида бу ғояни қўллаб-қувватламади, бироқ кейин кўникди. Ўғлимни 3-4 ёшида футболга бераман", деб айтмоқда ота.

Николай ўғлига исмни укаси билан бирга танлади. ФҲДЁ ходимлари бундай ноодатий исмни туғилганлик ҳақидаги гувоҳномага ёзишга базўр рози бўлдилар. Таъкидланишича, ФҲДЁ ходимлари ўз фаолиятларида кўплаб антиқа исмларга дуч келган бўлсалар-да, бироқ ҳали ҳеч ким ўз фарзандини Мессининг исми билан атамаган. 

Волковнинг ўғлининг футболчилик фаолиятига режалари катта. Бу нафақат ўғлига берган исми, балки боланинг онасининг фамилияси сабабли ҳамдир. Туғруқхонада болани онасининг фамилияси – Хаджи фамилиясига қайд қилишди. Футбол мухлисларига ўз вақтида "Барселона" сафида тўп сурган руминиялик Георги Хаджи исми яхши таниш.

Шу тариқа энди болакайнинг исми-фамилиясида бирданига "Барса"нинг икки номдор футболчисининг исмини учратиш мумкин.