Англиянинг «Тоттенҳэм» клуби ҳужумчиси Ҳарри Кейн Англия Премьер-лигасининг март ойидаги энг яхши футболчиси деб топилди.

Ўтган ойда «Тоттенҳэм» ҳужумчиси жамоасининг тўртта ўйинида бешта гол урди ва 22та гол билан АПЛнинг тўпурарлар рўйхатида биринчи ўринга кўтарилиб олди.

«Лестер» жамоаси бош мураббийи Клаудио Раньери эса ойнинг энг яхши мураббийи деб тан олинди.

Ўтган ойда италиялик мутахассис қўл остида «Лестер» тўртта ўйиндан 3тасида, яъни, «Уотфорд», «Ньюкасл» ва «Кристал Пэлас»га қарши ўйинларда бир хил – 1:0 ҳисобида зафар қучганди. «Вест Бромвич»га қарши ўйинда эса 2:2 ҳисобида дуранг қайд этилганди.