7 ва 8 апрель кунлари 80 га яқин Россия ва хорижий ОАВ 9-сайёра ("Х сайёра") сайёрамиздаги ҳаётга хавф солаётгани ҳақидаги маълумотларни чоп этишди. ОАВ бу маълумотни The Sun нашрига иқтибос келтирган ҳолда беришган. Нашр эса ўз навбатида олим Дэниэл Уитмайернинг сўзларидан ҳавола келтирган.

Аслида бу хабар Дэниэл Уитмайер фаолият юритувчи Арканзас университети сайтида 30 март куни пайдо бўлган. Собиқ астрофизик бўлган олимнинг ўзи айни вақтда математикадан дарс беради ва у 9-сайёра Ердаги ҳаётга хавф солиши ҳақидаги назариясини 1985 йилдаёқ билдирган. Айнан ўшанда бу назарияга бағишланган мақола Nature журналида чоп этилганди.

Уитмайер назариясига кўра, 9-сайёра ҳар 27 млн йилда Койпер камари (Қуёшдан миллиард километрлар узоқликда, Нептун орбитаси ортида жойлашган муз объектларининг дисксимон соҳаси, Қуёш тизимининг чегараси деб ҳам аталади) орқали ўтади. Бу ҳолат гравитацион ғалаёнларга олиб келади ва бунинг натижасида 9-сайёра Койпер камаридан астероидларни итариб чиқаради. Бунинг натижасида улар Қуёш тизимининг ичкарисига йўналиб, ундаги объектларни, жумладан Ерни бомбардимон қилади. Профессор Уитмайер Ерда жонзотларнинг оммавий йўқ бўлиб кетишини айнан шу билан боғламоқда. 2015 йил ноябрда Уитмайернинг тадқиқоти Monthly Notices of the Royal Astronomical Society журналида яна бир бор чоп этилди.

Уитмайер назарияси 30 йил аввал келтирилган бўлса-да, 9-сайёранинг очилиши ҳақида 2016 йил 20 январдагина эълон қилинди. Бироқ "Икс сайёрасига" "очилди" сўзини ишлатишга ҳозирча эрталик қилади, чунки олимларда айни вақтда унинг мавжудлигининг назарий асосларигина мавжуд. Мутахассисларнинг баҳолашича, 9-сайёрани излашга бир неча йил талаб қилиниши мумкин.