Ўзбекистон Давлат рақобат қўмитаси раиси Даврон Ҳидоятов 5 апрелда Халқаро молия корпорацияси (ХМК) делегацияси билан учрашув ўтказди.

Делегация таркибига Марказий Осиё давлатлари, Россия ва Украина молия ва банк секторига инвестициялар раҳбари Галина Клименко ва ХМКнинг Ўзбекистондаги ваколатхонаси раҳбари Зафар Хошимов кирди.

Учрашув давомида ХМК вакиллари Хорижий инвесторларни молия секторига жалб қилиш бўйича Қўмита иши, хорижий инвесторларга банклар ва молия ташкилотлари устав жамғармасидаги давлат ва хўжалик органлари акциялари пакетини сотиш шартлари билан таништирилдилар.  

Учрашувда, шунингдек, банкларни хусусийлаштиришда портфель инвесторларнинг иштироки шартлари ҳамда длавлат мулкини хусусийлаштирш жараёнида маслаҳатчиларни танлаш ва ёллаш жараёни муҳокама қилинди.

Ўзбекистон вакиллари хорижий инвесторларга банклар устав жамғармасидаги давлат ва хўжалик органлари акциялари пакетини сотиш тартиби ва шартлари, Deloitte, Ernst&Young, GrantThornton ва бошқа халқаро компаниялар билан тузилган келишувлар мисолида хусусийлаштиришда иштирок этишга хусусий баҳоловчи компаниялар, молиявий маслаҳатчиларни жалб қилиш амалиёти ҳақида маълумот тақдим қилдилар.

Учрашув сўнгида томонлар давлат мулкини хусусийлаштириш ва корпоратив бошқарувни такомилаштириш масалаларида ҳамкорликни янада кучайтиришга тайёрликларини билдирдилар.