Ҳозирда Ҳиндистоннинг "Мумбай Сити" клубида ҳам футболчи, ҳам мураббий сифатида фаолиятини давом эттираётган таниқли француз футболчиси Николя Анелька Чеченистон раҳбари Рамзон Қодиров таклифи билан икки кун Чеченистонда меҳмон бўлди. Унинг сафари 9 апрелда якунига етди.   

2000 йилги Европа чемпиони учун Грознийда сермазмун сайёҳлик дастури уюштирилди. Дастлаб футболчи "Терек" клуби футболчилари билан учрашди, 9 апрелда эса Қодиров билан бирга қоидасиз жанглар бўйича Grand Prix Akhmat 2016 мусобақасига ташриф буюрди.  

"Мен Грознийда кўрган барча нарса – футбол, стадион жаҳон даражасида. Фикримча, бу ерда футболчилар ўз ишларини аъло даражада бажаришлари учун барча шароит яратилган. Мен аввал Россияга футболчи сифатида келганман, бу сафар эса меҳмон сифатида келдим. Чеченистонга бундай мавқеда келганимдан хурсандман ва барчасини яқиндан кўра олишим мумкин", деб маҳаллий матбуотга ўз таассуротлари ҳақида гапириб берди 37 ёшли футболчи. 

Николя ўз фуқаролигини ўзгартиришни истамасада, бироқ агар Россиядан ишлаш ҳақида таклиф тушса рад этмаслигини айтди.

"Россияда ишлаш, дейсизми? Агар бундай имконият пайдо бўлса, нима учун йўқ? Мен доимо ўз уқувим ва тажрибам билан бўлишишга тайёрман. Ҳеч қандай муаммо йўқ. Сизларнинг юртингиз жуда гўзал. Бу ерга келишни барча дўстларимга тавсия қиламан", деб таъкидлаб ўтди Анелька.

Анелька ўз вақтида жаҳоннинг бир қатор номдор клублари – "Реал", "Ювентус", "Пари Сен-Жермен", "Манчестер Сити", "Ливерпуль", "Челси", "Арсенал" ва "Болтон"да тўп сурган.