Замонавий уй-жойлар қурилиши кўлами Бухоро вилоятида ҳам тобора кенгайиб бормоқда. Ўтган йили вилоятда 923 уй-жой фойдаланишга топширилди. Бу ҳақда “ЎзА” хабар бермоқда.

– Қурилишда 60 дан ортиқ турдаги материал ва ашёлардан фойдаланилади. Уларнинг бир қисми, масалан, цемент, металл черепицалар, арматура, сув иситгич, қозон, эшик-ром, бўёқ ва бошқалар бозордагидан арзон нархларда марказлаштирилган тартибда етказиб берилади, – дейди “Қишлоқ қурилиш инвест” инжиниринг компанияси Бухоро вилояти филиали бош муҳандиси Ҳусниддин Нурмуҳамедов.

“Бухоро қишлоқ қурилиш сервис” масъулияти чекланган жамиятида ўтган йили 3,5 миллион донадан зиёд деворбоп материал ишлаб чиқарилди. Олот, Ромитан, Қоракўл туманларидаги қурилиш ташкилотлари субъектнинг асосий буюртмачиларидир. Корхонанинг барқарор фаолият юритишида солиқ имтиёзлари ҳам муҳим ўрин тутмоқда.

Энергия тежамкор технологиялар билан жиҳозланган бундай корхоналар томонидан ўтган йили вилоятда 114,4 миллион донадан ортиқ деворбоп материал тайёрланди. Ана шу маҳсулотнинг 30 фоизидан ортиғи намунавий лойиҳалар асосида қурилаётган уй-жойларга етказиб берилди.

Умумий қиймати 290 минг еврога тенг, халқаро андозаларга жавоб берадиган технологиялар билан модернизация қилинган Ғиждувон туманидаги “Ғиждувон техстройпрогресс плюс” масъулияти чекланган жамияти Ғиждувон, Пешку, Шофиркон, Вобкент туманларидаги қурилиш ташкилотлари, жумладан, уй-жойлар бунёд этаётган пудрат ташкилотлари буюртмаларини ўз вақтида бажариб келаётир.

Вилоятда ўтган йили қурилиш материаллари ишлаб чиқаришга йўналтирилган 160 дан зиёд лойиҳа амалга оширилди. Улар орасида зарурат туғилганда муқобил ёқилғи – тошкўмирда ишлайдиган ғишт ишлаб чиқарувчи мини-заводлар, темир-бетон буюмлари, шлакоблок, пенаблок, оҳак-гипс тайёрлайдиган корхоналар бор. Ана шу лойиҳаларга тадбиркорлар ва тижорат банкларининг қарийб 40 миллиард сўмлик маблағи сарфланди. Яна бир муҳим жиҳати, мазкур сармоя ҳисобига 2,4 минг янги иш ўрни яратилди.

Вилоятда намунавий лойиҳалар асосида 992 уй қурилиши олиб борилмоқда. Ишончли таъминотчи шерикларга таянган ва замонавий қурилиш технологиясини қўллаётган бинокорлар янги уйларни Ватанимиз мустақиллигининг 25 йиллиги арафасида фойдаланишга топширишни режалаштирган.