11 апрель куни Афғонистон пойтахти Кобул шаҳрида мамлакат президенти Ашраф Ғани Аҳмадзайнинг "Арг" номли саройида атоқли шоир, олим ва давлат арбоби Алишер Навоий таваллудининг 575 йиллиги муносабати билан халқаро симпозиум ташкил этилди. Бу ҳақда Афғон телеграф агентлиги (АфТАГ) хабар тарқатган.

Симпозиумда сиёсат оламининг юқори мартабали намоёндалари, Навоий ижодий меросини ўрганиб келаётган бир қатор олимлар иштирок этган.

Тадбирда Ашраф Ғани Аҳмадзай чиқиш қилган ва ушбу сана муносабати билан Алишер Навоий шарафига янги расмий давлат мукофоти таъсис этилиши тўғрисидаги фармонни имзолаганини маълум қилган.

"Адолатга йўлни Навоий каби буюк шахслар очишади. Бизнинг ҳукумат сифатидаги мақсадимиз Навоий ўз ҳаёти давомида қарор топтиришга эришган одил ҳукмдорликни жорий қилишдик. Бурчимиз эса эски илм-фан ҳамда маданият вакилларининг китоб ва мақолаларидан тегишли хулосалар қилиш ва уларнинг хотирасини ёд этиш", — деган Ашраф Ғани ўз чиқишида.

Ашраф Ғани тез орада Алишер Навоий шарафига янги расмий давлат мукофоти таъсис этилишига ваъда қилган.

Ўз навбатида, Афғонистон президенти ўринбосари, мамлакатдаги ўзбек жамоаси етакчиси генерал Абдулрашид Дўстум бунинг учун президентга миннатдорчилик билдирган.