Россиянинг КРАНЭКС машинасозлик гуруҳи Ўзбекистонга 6 млн долларга экскаваторлар етказиб беради

Ўзбекистон 14 Апрель 2016 695

Россиянинг Иваново машинасозлик гуруҳи КРАНЭКС Ўзбекистон ва Қозоғистонга 2018 йилнинг охиригача 16,5 млн долларга экскаваторлар етказиб беради, деб маълум қилди Иваново вилояти ҳукумати раиси ўринбосари Олег Пташкин.

Пташкиннинг айтишича, 2016 йил март-апрелида Россия иқтисодий ривожланиш вазирлиги билан 2016-2018 йилларда Ўзбекистон ва Қозоғистонга "КРАНЭКС Лизинг" компаниясининг маҳсулотларини етказиб бериш бўйича иккита лойиҳа келишиб олинган.

"2018 йил охиригача КРАНЭКС Ўзбекистонга 6 млн долларлик, Қозоғистонга эса 10,5 млн долларлик экскаваторлар етказиб бермоқчи", деб айтди Пташкин.

Маълум қилинишича, 2016 йилнинг январь ойидаёқ Ўзбекистон билан Иваново вилояти ўртасидаги ташқи савдо айланмаси 8,.3 млн долларни, Қозоғистон билан эса 850 минг доллардан кўпроқни ташкил қилган.

КРАНЭКС машинасозлик гуруҳи турли моделдаги экскаваторлар, эҳтиёт қисмлар ишлаб чиқаришга ихтисослашган ва мелиоратив ишлар учун экскаваторларни серияли тарзда ишлаб чиқарувчи Россиядаги ягона корхона ҳисобланади. Бугунги кунда корхона Ўзбекистон, Қозоғистон, Озарбайжон, Беларусь, Арманистон ва Кубага техника етказиб беради. Корхона ишлаб чиқарадиган умумий маҳсулот ҳажмида экспорт қилинадиган маҳсулот ҳажми 25 фоизни ташкил қилади.

Кўпроқ янгиликлар