Спорт кийими ва пойафзали ишлаб чиқарувчи Puma компанияси япон дизайн-бюроси GraphersRock билан бирга кроссовкалар тўпламини чиқарди. Кроссовкалар юқори технологик Disc Blaze моделига асосланган ва киберпанк услубида яратилган. Бу ҳақда Highsnobiety маълум қилди.

Кроссовкалар 4 та рангда таклиф қилинади, Tokyo Japan ёзуви ҳамда пиктограмма ва типографик белгилар билан безалган.

15 апрелда кроссовкалар Японияда сотувга чиқарилди, қолган дунёда эса 22 апрелда Puma’нинг баъзи дўконларида сотила бошланади. Японияда кроссовканинг нархи 19 минг иенни (174 доллар) ташкил қилади.

Puma компаниясига 1948 йилда Германияда Adidas маркаси асосчиси Адольф Дасслернинг укаси Рудольф Дасслер томонидан асос солинган. Компаниянинг бош офиси Германиянинг Херцогенаурах шаҳрида жойлашган. Айни вақтда бренд "Арсенал" ва "Боруссия" футбол клублари, енгил атлетика бўйича Ямайка терма жамоаси, бокс бўйича Куба терма жамоаси, футбол бўйича Италия терма жамоасига ҳомийлик қилади, "Формула-1"нинг Ferrari жамоаси билан ҳамкорликда кийим ва пойафзал тўпламини чиқаради.