Хитойлик миллионер Яо Наньшань Лю Лицзянь исмли фермер аёлни деб ўз бойлигидан воз кечди. Бу ҳақида Mashable нашри хабар берди.

Нашрнинг ёзишича, бундай ажойиб севги ҳикояси ҳаттоки тошбағир одамларга ҳам умид беради.

2015 йилнинг октябрь ойигача Наньшань Испанияда истиқомат қилган. Аммо 57 ёшли миллионер ўзининг Европадаги барча бойликларидан воз кечиб, Хитойдаги Чжэцзян вилоятидаги қишлоқлардан бирига “ҳақиқий севгиси”нинг олдига қолган умрини ўтказиш учун кўчиб келган.

Жуфтлик 2013 йилда учрашиб қолган. Наньшаннинг севгилиси Лицзянь бева бўлиб, унинг қизида тиббиётда кам учрайдиган қон касаллиги мавжуд. Миллионер ўз севгисини изҳор этганда, Лицзянь уни муаммолари билан уринтирмаслик учун бу изҳорни рад этди. Наньшань эса унинг “рад” жавобига кўнмади. У Испаниядан барча бойлигини ўз фарзандларига ўтказиб, Чжэцзян қишлоғига қайтиб келди. Жуфтлик Рождество куни турмуш қуришди.

Ҳозирги кунда жуфтлик кичик бир меҳмонхонани бошқаришмоқда.