Бутунжаҳон боксёрлик уюшмаси (WBA) версияси бўйича 76,2 кг гача вазн тоифасида германиялик жаҳон чемпиони Феликс Штурм допинг қабул қилишда ушланди. Унинг қон намунаси станозолол анаболик моддаси борлигига ижобий натижа берди.

Боксчидан допинг намуна россиялик боксчи Фёдор Чудинов билан жангидан кейин олинган, деб маълум қилди "Патриот" промоутерлик компанияси спорт директори Дмитрий Лучников. Допинг синовни Германия миллий антидопинг агентлиги (NADA) ўтказган, деб хабар бермоқда ТАСС ахборот агентлиги.

Февралда Штурм ва Чудинов ўртасидаги жангда немис чарм қўлқоп устаси очколар бўйича ғолиб бўлганди. Россиялик боксчи томони ҳакамларнинг қароридан норози бўлган: ҳакамлардан бири дуранг натижа қайд қилган, қолган икки ҳакам ғалабани минимал устунлик билан Штурмга берган. Жангнинг натижаси юзасидан шикоят аризаси берилган ва боксчиларнинг қўлқоплари экспертизаси ўтказилган.

Энди россиялик боксчига у ютқазиб қўйган WBA жаҳон чемпиони унвони қайтарилиши мумкин.