«Рома» жамоаси ҳужумчиси Франческо Тотти ўз футболчилик фаолиятини MLS чемпионатида давом эттириши мумкин. Бу ҳақда TMW хабар тарқатган.

Манбанинг ёзишича, ушбу 39-ёшли италиялик футболчига «Нью-Йорк Космос» жамоасидан қизиқиш мавжуд. Қайд этилишича, бу жамоа вакиллари римликлар раҳбарияти билан алоқага чиққан.

Бу жамоада ўз вақтида Пеле, Беккенбауэр ва Рауль каби футболчилар фаолиятининг сўнгги қисмини ўтказишганди.

Римликлар жамоаси Тотти билан шартномани узайтирмасликка қарор қилган. Америкаликлар эса футболчига 4 ой учун 500 минг доллар маош тўлашмоқчи.

Бундан олдинроқ, римликлар жамоаси бош мураббийи Лучано Спаллетти ва Тотти ўртасида кийим алмаштириш хонасида муштлашув рўй бергани ҳақида айтилган, аммо кейинроқ мураббий бу хабарни инкор қилганди.