Венесуэла парламенти (Миллий ассамблея) 20 апрель куни конституцион ислоҳот ҳақидаги қонун лойиҳасини бир ўқишда маъқуллади.

Бу ташаббус мамлакатда президентлик ваколати муддатини 6 йилдан 4 йилга туширишни ҳамда бир шахснинг чекланмаган муддатга сайланиш имкониятини чеклашни назарда тутади.

Боливариан республика парламентида айни вақтда президент Николас Мадуронинг мухолифлари бўлган Демократик бирлик блоки вакиллари мутлақ кўпчиликни ташкил этади.

"Венесуэлада кенг кўламли сиёсий ва иқтисодий инқироз давом этмоқда. Кема кўп жойларга сузиб борди. Энди биз венесуэлаликларни мавжуд вазиятдан олиб чиқишимиз керак", дея мухолифат вакили, қонун лойиҳаси муаллифи Луис Эмилио Рондоннинг сўзларини келтиради Notimex агентлиги.

2009 йилда ўтказилган референдумлар натижасида мамлакат конституциясига ўзгартиришлар киритилган, президент, мэрлар ва губернаторларнинг 2 мартадан ортиқ лавозимга сайланиши ва тайинланиши борасидаги чеклов олиб ташланганди. Энди парламентдагилар фақат бир марталик муддат ҳақида таклиф қилишмоқда.

2015 йилнинг декабрида ўтказилган парламент сайловларида Венесуэланинг мухолифат кучлари парламентдаги жами 167 та жойдан 109 тасига эга бўлди. Бу кейинги 17 йил ичида чавистлар (марҳум диктатор Уго Чавес тарафдорлари) мағлубияти бўлди.

Январда Венесуэлада ҳукуматнинг қонун чиқарувчи ва ижро этувчи тармоқлари ўртасидаги низолар юзага келди.