Украинада иккита янги русумдаги Д-436-148ФМ двигатели ўрнатилган "Антонов" Ан-178 юк транспорт самолёти навбатдаги синов парвозини амалга оширди. Ушбу воқеа тасвирланган видеолавҳалар корхонанинг Facebook’даги саҳифасига жойлаштирилган, деб хабар қилмоқда "5 канал" телеканали.

Очиқ манбаларга кўра, Д-436-148ФМ двигателини, "Мотор Сич" ОАЖ "Ивченко-Прогресс" давлат корхонаси билан ҳамкорликда Ан-178 юк самолёти учун махсус ишлаб чиқарган. Унинг тортиш кучи двигателнинг барча, айниқса, парвоз тартибида кучайтирилган, газ эмиссияси кўрсаткичлари яхшиланган. Мотор шовқинини камайтириш мақсадида, самарали товуш ютувчи конструкциялар қўлланилган.

2015 йил 9 декабрида "Прогресс" конструкторлик бюроси бош конструктори Федор Муравченко шарафига номланган Д-436-148ФМ двигателининг биринчи сертификатланган синови амалга оширилган эди. 2016 йил 5 февралида Ан-178 юк самолётининг биринчи прототипи синов парвозига кўтарилган, 27 дақиқали муваффақиятли учишдан сўнг ерга қўнган эди.