Британиялик фазогир Тим Пик Халқаро коинот станцияси бортида туриб Лондон марафонида иштирок этди. Бу ҳақда Reuters ахборот агентлиги хабар бермоқда.

44 ёшли фазогир 26,2 мил (42 км) масофани 3 соату 35 дақиқада югуриб ўтди ва шу тариқа коинотдаги биринчи марафончи бўлди. У масофани ХКСда Лондондаги марафонни iPad’да реал вақтда кузатган ҳолда махсус югуриш йўлагида босиб ўтди.

Пикнинг Ердаги марафонча югуришда кўрсатган натижаси юқорироқ бўлган: 1999 йилда у Лондон марафонини 3 соату 18 дақиқада босиб ўтган. Шунингдек маълум қилинишича, бу йилги марафон ғолиби масофани 2 соату 3 дақиқада босиб ўтган.

Фазогир югуришдан аввал твиттерда Лондоннинг коинотдан олинган суратини чоп этди.

Пик марафонда иштирок этиш қарорини декабрда маълум қилганди. Ўшанда у марафонни 3 соату 30 дақиқада югуриб ўтишга умид билдирганди ва у бунга деярли эришди.