Қирғизистон парламентининг Конституциявий қонунчилик, давлат тузилмаси, суд-ҳуқуқ масалалари ва регламент бўйича қўмитаси Исҳоқ Масалиев номзодини спикерлик лавозими учун маъқуллаган. Бу ҳақда «ТАСС» ахборот агентлиги республика қонун чиқарувчи органига таяниб хабар берган.

«Масалиев номзоди профилли қўмита томонидан ҳеч қандай муҳокамаларсиз маъқулланди», — дейилган матбуот хизмати хабарида.

Масалиевнинг номзоди «Онугуу» («Прогресс») партияси фракцияси томонидан таклиф қилинган.

Бундан олдинроқ, парламент раиси лавозимига социал-демократик партия фракцияси парламент кўпчилиги коалицияси етакчиси Чиннибой Турсунбеков номзодини илгари сурган эди.

Қирғизистон парламенти спикери сайлови 27 апрель, чоршанба куни бўлиб ўтиши кутилмоқда.

Парламентнинг "Киргизстан" фракцияси вакиллари спикерлик лавозимига етакчилари Канат Исаевни илгари суришган. "Онугуу" (тараққиёт) партиясининг парламентдаги фракцияси ҳам ўз вакили Бакит Торобаев номзодини спикерликка тавсия этан.

Умуман, Қирғизистон республикаси парламенти таркибида олтита фракция мавжуд, уларнинг тўрттаси коалицияга бирлашиб, парламентда кўпчиликни ташкил этади.

Эслатиб ўтамиз, 13 апрель куни Қирғизистон парламентининг аввалги спикери Асилбек Жээнбеков акаси Сооронбай Жээнбековнинг номзоди бош вазирликка тавсия қилиниши ортидан ўз лавозимини тарк этганди.