Ўзбекистон миллий терма жамоаси бош мураббийлигидан истеъфога чиқарилганидан буён ишсиз юрган Миржалол Қосимов яқин орада Қозоғистон клубларининг бирини бошқариши мумкин. Бу ҳақда Sports.kz хабар тарқатган.

Манбада 45 ёшли мураббийга айнан қайси жамоа қизиқиш билдираётгани ҳақида аниқ маълумот берилмаган. 

Лекин тахминларга кўра бу «Тобол» клуби бўлиши мумкин. Бу жамоанинг бош мураббийи Дмитрий Огай бироз аввалроқ истеъфога чиқарилган эди.

Миржалол Қосимов ўзининг мураббийлик фаолиятини 2006 йилда бошлаган. У Ўзбекистон миллий ва олимпия терма жамоалари ҳамда «Бунёдкор» клубини бошқарган.

У «Бунёдкор» бош мураббийи сифатида 3 марта Ўзбекистон чемпиони бўлган, икки марта Ўзбекистон кубоги ғолиблигига эришган ҳамда жамоа билан ОЧЛда икки марта ярим финалга чиқишга муваффақ бўлган.

Қайд этиш керак, 2006 йил Миржалол Қосимов олимпия терма жамоасида Вадим Абрамовга ёрдам берган. У ЖЧ—2018 2-саралаш босқичи доирасидаги КХДРга қарши сафар беллашувидан сўнг истеъфога чиққанди.