Samsung бир неча йилдан бери ўз фанатларига эгилувчан смартфонларни ишлаб чиқаришга ваъда бериб келади, бироқ Galaxy Edge сериясидаги қурилмаларда қўлланадиган чети эгилган дисплейлардан у ёғига ўта олмади. Ўтган йил бошида Samsung эгилувчан қурилмалар 2016 йил бошида пайдо бўлиши ҳақида ҳужжатни чоп этганди. Ишлаб чиқарувчининг режалари навбатдаги марта ўзгарган кўринади. ETNews нашри ўз манбаларига иқтибос келтирган ҳолда бундай қурилмалар ишлаб чиқарилиши кейинги  йилга қолдирилганини маълум қилди. 

"Эгилувчан OLED-дисплейнинг яратилиши бизнинг режаларга кўра бормоқда. Биз ҳозир оммавий ишлаб чиқариш босқичида турибмиз ва буни ҳамкорларимиз билан муҳокама қилмоқдамиз", деб аввалроқ айтди Samsung Display ходими Ли Чанг-хун.

Гапларга қараганда, Samsung’нинг эгилувчан дисплейли смартфони Project Valley деган код номи олган. Афсуски, компания бундай шаклдаги қурилма фойдаланувчиларга қандай имкониятлар беришини маълум қилмаяпти.