Ҳиндистоннинг шимолидаги Кашмир штатидаги тартибсизликларда камида 21 киши ҳалок бўлди, 230 дан ортиқ киши жароҳат олди. Бу ҳақда штат полицияси маълум қилди.   

Хавфсизлик кучлари ва "Хизб-ул-Мужаҳидин" айирмачи гуруҳининг 3 аъзосининг йўқ қилинишига қарши чиқаётган маҳаллий аҳоли ўртасидаги тўқнашувлар 8 июлда бошланганди. 9 июлда полиция бўлимига уюштирилган ҳужумдан кейин 3 нафар полициячи бедарак йўқолганди.

Жамму ва Кашмир ҳукумати фуқароларнинг ўлими муносабати билан афсус билдирди ва ҳуқуқ-тартибот муассасалари томонидан ваколатларнинг чегарадан чиқиши ҳолатларини тергов қилишга ваъда берди.

Кашмирдаги айирмачи гуруҳлар 1980-йиллардан бери Ҳиндистондан мустақил бўлиш учун қуролли кураш олиб боради. Ҳиндистон ҳукумати жангариларни қурол-аслаҳа билан таъминлашда Покистонни айблаб келади, Покистон эса бу айбловларни рад этиб келади.